Bu gün Bakıda və Abşeron yarımadasında buludlu hava şəraitinin üstünlük təşkil edəcəyi, fasilələrlə yağış yağacağı, gündüz tədricən kəsiləcəyi gözlənilir. Bu, Ekologiya və Təbii Sərvətlər Nazirliyi Milli Hidrometeorologiya Departamentinin bu günə olan hava proqnozu idi.

Ancaq bu gün səhər paytaxt sakinləri şəhərdə qəribə mənzərə ilə üzləşdi. Bakının səması alışmadığımız sarı rəngdə idi. Üstəlik, diqqətlə baxdıqda göydəki toz buludlarını müşahidə etmək mümkündür.

Qeyd edək ki, hazırda Ekologiya və Təbii Sərvətlər Nazirliyində iclas keçirildiyindən məsələ ilə bağlı aidiyyatı şəxslərdən məlumat ala bilmədik.

Xatırladaq ki, bir müddət əvvəl Bakıya palçıqlı yağış yağmışdı. Həmin vaxt Ekologiya və Təbii Sərvətlər Nazirliyi məlumat yayaraq, havada olan tozun miqdarının normadan 1,5-2,5 dəfə çox olduğunu bildirmişdi.

Nazirliyin mütəxəssislərinin fikirlərinə görə, buna əsas səbəb Ərəbistan səhralarında müşahidə olunan toz burulğanının atmosferin yuxarı təbəqələrinədək qalxmasıdır. Bu toz hissəcikləri atmosferin yer səthinə yaxın olan qatlar üzrə hava cərəyanlarının bərqərar olunmuş cənub, cənub-qərb axınları ilə Azərbaycana da gəlib çatıb.

Məlumatda bildirilirdi ki, Nazirliyin Milli Hidrometeorologiya Departamentinin Hidrometeoroloji Proqnozlar Bürosunda yeni tətbiq olunmuş EUMETSAT peyk sistemi vasitəsi ilə bu hadisə hər 15 dəqiqədən bir yeniləşən peyk görüntüləri ilə izlənilir.

Mövzuya qayıdacağıq.

Az sonra Bakıda çəkilmiş yeni fotoları təqdim edəcəyik. Əgər ANS PRESS oxucularının da Bakının "sarı" rəngi ilə çəkilmiş fotoları varsa, bu ünvana göndərə bilərlər: [email protected]