Fövqəladə Hallar Nazirliyinin (FHN) Dövlət Material Ehtiyatları Agentliyi Dövlət Taxıl Fondu üçün ölkədə istehsal olunmuş yüksək keyfiyyətli buğda tədarükünə başlayır. FHN-dən verilən məlumata görə, taxılın toplanması bu ilin iyulun 23-dən oktyabrın 1-nə kimi “Abşeron Taxıl MMC”, “Dəvəçi-Dəyirman MMC”, “Karat-Holdinq”, “Karmen” FATOĞLU, N.Quliyev adına Bakı-Taxıl, “Araz ASC” “Aveta”, “EL” KM və “Neon” müəssisələrinin vasitəsilə həyata keçiriləcək. Taxıl yerli buğda istehsalçılarından bir tonu 230 manata alınacaq.

Tədarük olunacaq taxıl Azərbaycan Respublikası Nazirlər Kabinetinin 2009-cu il 7 iyul tarixli 105 nömrəli Qərarı ilə təsdiq edilmiş “Dövlət Taxıl Fondunun saxlanması və istifadəsi Qaydaları”nın 1 nömrəli əlavəsi ilə müəyyən edilmiş keyfiyyət göstəricilərinə cavab verməlidir. FHN-in yaydığı məlumatda bildirilir ki, keyfiyyət göstəricilərinin tələblərinə cavab verməyən və məhsulun keyfiyyət göstəriciləri barədə akkreditə olunmuş laboratoriyadan sertifikatı olmayan buğda məhsulu qəbul edilməyəcək. ANSPRESS