Bakıda Yeni il hazırlıqlarına start verilib. Şəhərin bütün parklarında yolkalar quraşdırılacaq. Bakı Şəhər İcra Hakimiyyəti (BŞİH) ötən illərdə olduğu kimi bu il də paytaxta iki iri yolkanın quraşdırılması üçün sifariş verib. BŞİH Ticarət və xidmət departamenti mətbuat xidmətinin rəhbəri Əliabbas Bağırovun ANS-ə verdiyi məlumata görə, böyüklüyü ilə fərqlənən hər iki yolka ölkəmizə Rusiyadan gətirilib. Qeyd edək ki, “Azneft” meydanında quraşdırılacaq yolkanın hündürlüyü 12 metrə yaxın olacaq. Bakının küləkli şəhər olması nəzərə alındığından bu il quraşdırılacaq yolkaların hündür olması məqbul hesab edilməyib. “Azneft” meydanında quraşdırılan yolka dəmir konstruksiyadan yığılır. Yolka tam yığılandan sonra üzəri yaşıl örtüklə örtüləcək və oyuncaqlarla bəzədiləcək. Ötən il olduğu kimi bu il də “Azadlıq” meydanında quraşdırılacaq yolka digərlərindən bir qədər fərqlənəcək. Bu yolkanın layihəsi Rusiya şirkətlərindən birinə aiddir və həmin şirkətin işçiləri sifariş əsasında yolkanın quraşdırılması işlərində iştirak edəcəklər. Hələliksə digər işləri yerli şirkətlərdən biri həyata keçirir.

Dənizkənarı Bulvar İdarəsinin rəis müavini Nazim Məcidovdan alınan məlumata görə, Yeni ilqabağı “Qız qalası”nın ətrafında da yolkanın quraşdırılması və burada buz meydançasının salınması nəzərdə tutulur.
Şəhərin Yeni ilqabağı hazırlığı işıq dirəklərinə də sirayət edib. Artıq dirəklər xüsusi işıqlandırma sistemi olan tablolarla bəzədilib. Hava qaralan kimi həmin işıqlar işə düşərək, bakı sakinlərində Yeni il əhval-ruhiyyəsi yaradacaq. Bayrama hazırlıq işlərinin yaxın bir həftə ərzində yekunlaşacağı planlaşdırılır.

Bayramda uşaqları sevindirəcək Şaxta babaların da qeydiyyatı 2 günə başa çatacaq. Təxminən 50-yə yaxın Şaxta babaya icazənin isə dekabrın 15-i verilməsi planlaşdırılır.

Bu arada əsasən şəhərin mərkəzindəki mağazalara da yeni il üçün hədiyyələr və yolkalar gətirilib. Hər il olduğu kimi bu dəfə də yolkaların qiyməti onların böyüklüyünə görə dəyişir. Ən kiçik yolkanın qiyməti 25, ən böyüyünün isə 90 manat təşkil edir. ANSPRESS