Bakı-APA. Azərbaycanın Sankt-Peterburqdakı baş konsulu Qüdsi Osmanov son günlər internet səhifələrində yayılan böhtan və yalan məlumatlarla bağlı bəyanat yayıb. Konsulluğun protokol xidmətindən APA-ya verilən məlumata görə, bəyanatda bildirilir ki, martın 19-da Heydər Əliyev Fondunun Rusiyadakı nümayəndəliyi və Azərbaycanın Sankt-Peterburqdakı Baş konsulluğunun təşkil etdiyi, Novruz bayramına həsr edilmiş, 12 min nəfərin iştirakı ilə keçirilən konsertdə baş vermiş təxribatla bağlı hüquq-mühafizə orqanlarına müraciət olunub, videomateriallar təqdim edilib: “Videomateriallarda İlkin və Nizami Məmişovların, həmçinin Mirzə Baxşıyevin təxribatda iştirakı açıq aydın görünür. Zənnimcə, bu təxribatı idarə edən və törədən şəxslər dövlətimizin və xalqımızın düşmənlərinə qulluq edirlər. Məsələ ilə bağlı, Rusiya Xarici İşlər Nazirliyinin Sankt-Peterburqdakı nümayəndəliyinə tərəfimizdən rəsmi nota göndərilib. Məsələnin ciddiliyini dərk edərək, bu insidentlə məşğul oluruq. Qanun çərçivəsində müvafiq qaydada bu işlər hüquq-mühafizə orqanları tərəfindən araşdırılır. Bu gün gündəmdə Qüdsi Osmanov yox, dövlətimizin rəsmi nümayəndəsinin və dövlətimizin şərəfinin qorunması durur. Videogörüntülərdə canfəşanlıqla çıxış edən Aybəniz Səmədzadə, Sankt-Peterburq gəncləri arasında tanınmış, qeyri-kafi imicə malik olan, ailəsi tərəfindən rədd edilmiş bir şəxsdir. Ondan böhtan məqsədilə istifadə edənlərə həmin şəxsə vəkil tutmaq tərəfimdən tövsiyə edilib. Bu təxribatı törədən və kənardan idarə edən şəxslər birmənalı şəkildə qanun çərçivəsində cavab verəcəklər. Sosial şəbəkələrdə süni şəkildə yayılan yalan və böhtanlara gəldikdə, bu, təxribatı yaradanların çox rəngli fantaziyasından xəbər verir. Bir mənalı olaraq bəyan edirəm ki, mənim ünvanıma Aybəniz Səmədzadə ilə bağlı səsləndirilən fikirlər əsasız və böhtandır. Bu təxribatın kim tərəfindən törədildiyi və hansı məqsəd daşıdığı yaxın zamanlarda aydın olacaqdır”.