Eldar Qasomov və Nigar Camal "Eurovision 2011" mahnı müsabiqəsində qələbə qazanmaqla Azərbaycanın qarşısına bir sıra öhdəliklər və vəzifələr də qoyublar. Gələn il Bakıda keçiriləcək "Eurovision 2012"yə 45 ölkədən 10 minlərlə turist axını olacaq. Və bu turistlər Azərbaycanda olduqları müddətdə sözsüz ki, şəhərimizi gəzməyə çıxacaqlar. Əlbəttə bu zaman onlara bələdçi və yaxud da ən azından polisin köməyi lazım olacaq. Bütün dünya üzrə turistlərin ilk müraciət etdikləri etibarlı ünvan isə asayiş keşikçiləridir.

Görəsən, Azərbaycan polisi turistlərlə ünsiyyətə hazırdırmı? Ən azından bütün dünyada ən geniş istifadə olunan ingilis dilində ən çox istifadə olunan sözləri bilirlərmi?

Əvvəlcədən onu deyim ki, bu il Rusiyanın Soçi şəhərində qış idman növləri üzrə Olimpiada oyunlarının keçirilməsi ilə əlaqədar, nəninki hüquq mühafizə orqanlarının əməkdaşlarına, hətta yanğınsöndürənlərə də ingilis dilini öyrənmək tapşırılıb. Rusiya mətbuatının məlumatına görə, bununla bağlı xüsusi ingilis-rus danışıq kitabçası da hazırlanıb.

Məsələyə rəsmi şəxslərin mövqeyini öyrənməyə çalışdıq. Daxili İşlər Nazirliyinin mətbuat xidmətinin rəis müavini, polis polkovnik-leytenantı Ehsan Zahidov ANS PRESS-ə açıqlamasında bizi maraqlandıran sualları belə cavablandırdı: "Əvvəla, "Eurovision 2012"nin Azərbaycanda keçiriləcəyi 2-3 gündür bəlli olub. İkincisi də, bizim elə polislərimiz var ki, 5 dil bilirlər. O ki qaldı hazırlığa, əlbəttə ki, biz buna ciddi hazırlaşacağıq. Daxili İşlər Nazirliyi ölkədə keçiriləcək belə böyük tədbirə hazırlıqsız olmayacaq. Nazirliyin növbəti iclaslarında tədbirlər planı tutulacaq və bu planda bütün məsələlər öz əksini tapacaq".

Ümid edirik ki, belə də olacaq. Bununla belə bütün dünyada bu kimi tədbirlər zamanı könüllülərin xidmətindən də istifadə olunur. Yəni xarici dil bilən tələbələr və Vətəni üçün nə isə etməyə çalışan vətəndaşlar ödənşsiz olaraq turistlərə tərcüməçilik təklifi edirlər. Sevindirici haldır ki, artıq "Facebook" sosial şəbəkəsində "Eurovision-2012" mahnı müsabiqəsinin Azərbaycanda keçirilməsi ilə bağlı xüsusi könüllülər səhifəsi yaradılıb. Artıq həmin səhifəni 240 nəfər bəyənib və dəstəkləyir. Qeyd edək ki, könüllülər səhifəsinin bu yaxınlarda yaradılmasına baxmayaraq bu qədər istifdəçinin səhifəni bəyənməsi böyük göstərici hesab edilir.

Məşhur teleprodüsser Murad Dadaşov da bu yaxınlarda ANS-in qonağı olarkən, ölkəmizin "Eurivision" kimi önəmli tədbiri yaxşı keçirməsi üçün könüllülərin xidmətinə ehtiyacı olduğunu bildirmişdi.

Onu da bildirək ki, Türkiyədə analoji xidmət növü artıq var. Burada tələbələr turistlərin ən çox olduqları muzeylərin qarşısında duraraq öz tərcüməçilik xidmətlərini təklif edirlər. Nəticədə az da olsa bəxşiş alırlar, həm də öz dil qabiliyyətlərini inkişaf etdirirlər.