Aşura günü münasibətilə Qafqaz Müsəlmanları İdarəsinin Qazilər Şurasının fətvası ilə paytaxt Bakının yeddi məscidində və Sumqayıt şəhərində qanvermə aksiyaları təşkil olunub. Səhər saat 8.00 başlayan aksiyada xeyli sayda insan iştirak edib. "Əjdərbəy" və "Təzə Pir" məscidlərində isə növbələr yaranıb. Qan verənlər bu aksiyanı digər dini ayinlərdən daha üstün tutduqlarını deyibrlər.

"Təzə Pir" məscidinin təmiri hələ tam başa çatmadığından, Aşura mərasimləri məscidin həyətində keçirilir. Göy məsçid kimi tanınan "Hacı Əjdərbəy" məscidində isə qan vermək istəyənlərdən ibarət növbə yaranıb.

Qafqaz Müsəlmanları Ruhani İdarəsinin başçısı, Hacı Allahşükür Paşazadə "Təzə Pir" məscidində təşkil edilən qanvermə aksiyasına qoşulub. Aşura günü münasibətilə bütün möminlərə başsağlığı verən şeyx Kərbəla şəhidləri ilə yanaşı 20 Yanvar və torpaqlarımızın azadlığı uğrunda canlarından keçən şəhidlərimizi də yad edərək onlara rəhmət dilədi. Şeyxülislam bildirdi ki, bu gün qan verən müsəlman bir insanı xilas etməklə Allah qarşısında savab qazanır. O, Xocalı faciəsinin Kərbəla hadisələrinə bənzədiyini dedi.

Qanvermə aksiyasında Bakı İslam Universitetinin rektoru, Qafqaz Müsəlmanları İdarəsinin Qazilər Şurasının üzvü Hacı Sabir Həsənli də iştirak edib.

Qanvermə aksiyası axşam saat 18.00-ə qədər davam edəcək.
Mərkəzi Qan Bankından verilən məlumata görə, insanların sayı daha çox olacağı təqdirdə, qanvermə saat 20.00-dək uzadıla bilər.

Qeyd edək ki, insanlar müayinə edildikdən sonra qanvermə prosesinə qoşulurlar. Toplanan qan Mərkəzi Qan Bankının laboratoriyalarında ciddi yoxlanıldıqdan sonra əsasən talassemiya və hemofiliya xəstəliyindən əziyyət çəkən uşaqlara veriləcək.

Mərkəzi Qan Bankının baş həkimi İlhamə Zeynalovanın ANS-ə verdiyi məlumata görə, qan verən insanların sayı çox olduğundan, bu aksiyanı imamların 7 və 40 mərasimlərində keçirməyi düşünürlər.

Xatırladaq ki, ənənəvi qanvermə aksiyasları Qafqaz Müsəlmanları İdarəsinin təşəbüssü ilə artıq bir neçə ildir ki, keçirilir. ANSPRESS