Həmin ünvanda keçirilən toy mərasiminə qonaq qismində dəvət olunan, Ağdaş şəhər sakini, 1952-ci il təvəllüdlü Elxan Kərim oğlu Fərhadov qanunsuz gəzdirdiyi “Makarov” tipli tapança ilə həmyerlisi, 1957-ci il təvəllüdlü Rahim Mətləb oğlu İbrahimova atəş açıb. R. İbrahimov aldığı güllə yarasından hadisə yerindəcə keçinib. Hadisəni törədən E. Fərhadov isə Ağdaş rayon Polis Şöbəsi əməkdaşlarının həyata keçirdiyi əməliyyat-axtarış tədbirləri nəticəsində tutularaq məsuliyyətə cəlb edilib. Qətl hadisəsinin baş vermə səbəbləri barədə rayon Prokurorluğundan əlavə məlumat verilməsə də, adıçəkilən şəxslərin arasında illərdən bəri davam edən köhnə ədavətin olduğu bildirilib.

Başqa bir mənbədən isə APA-ya bildirilib ki, həmin şəxslərin arasında qan davası olub.

Baş vermiş qanlı hadisə ilə bağlı Ağdaş rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) və 228.1-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, saxlama, satma, daşıma və gəzdirmə) maddələri ilə cinayət işi başlanıb, araşdırma aparılır.

 

APA