Bu gecə paytaxtın Binəqədi rayonu ərazisində, Bakı-Quba yolunun 6-cı kilometrliyində ölümlə nəticələnən ağır yol qəzası baş verib.

ANS PRESS-in hadisə yerindəki əməkdaşının verdiyi məlumata görə, Bakı istiqamətində hərəkət edən “Mercedes” markalı avtomobil eyni istiqamətdə gedən “KamAZ” markalı yük maşınına çırpılıb. Hadisə nəticəsində “Mercedes”-in hələlik şəxsiyyəti dəqiqləşdirilməmiş sürücüsü ölüb, həmin maşının sərnişini-24 yaşlı Yevlax sakini Hüseynova Rəqsanə Ələsgər qızı ağır xəsarət alıb. Yaralı təcili tibbi yardım briqadası tərəfindən Respublika Klinik Xəstəxaansına çatdırılıb. Həkimlər Rəqsanə Hüseynovanın vəziyyətini ağır kimi qiymətləndirirlər.

Hadisə yerinə Binəqədi Rayon Polis İdarəsinin, Baş Dövlət Yol Polisi İdarəsinin istintaq və təhqiqat şöbəsinin əməkdaşları, eləcə də Fövqəladə Hallar Nazirliyinin xilasediciləri cəlb ediliblər. Faktla bağlı araşdırmalar başlayıb. Baş Dövlət Yol Polisi İdarəsinin istintaq və təhqiqat şöbəsinin müstəntiqi Vaqif Cəfərov deyib ki, ilkin ehtimallara görə, “Mercedes” markalı avtomobil hərəkət yoluna sürətlə çıxıb və sürücü idarəetməni itirdiyindən yük maşınına çırpılıb. ANSPRESS