Milli Dövlətçilik Partiyasının sədri Nemət Pənahlıya qarşı daha bir ittiham irəli sürülüb. Bu barədə onun vəkili E. Sadıqov bildirib. Onun sözlərinə görə, yeni ittiham CM-nin 127.2.3 maddəsilə (ümumi təhlükəli üsulla, xuliqanlıq niyyəti ilə törədildikdə) irəli sürülüb.

Xatırladaq ki, yanvarın 8-də N. Pənahlı öz dostu Ceyhun Fərzəliyev ilə birlikdə vətəndaş Eldar Rzayevin şikayəti əsasında saxlanılıb. Yanvarın 10-da Nəsimi Rayon Məhkəməsi Pənahlı və Fərzəliyevi CM-in 221.3 maddəsilə (silah və ya silah qismində istifadə edilən əşyaları tətbiq etməklə xuliqanlıq) iki ay müddətində həbs edib. Yanvarın 17-də Bakı Apellyasiya Məhkəməsi bu qərarı qüvvədə saxlayıb.

N. Pənahlı və Fərzullayev E. Rzayevin şikayəti əsasında saxlanılıb. Şikayətçi bildirib ki, yanvarın 7-də sözügedən şəxslər onu Nəsimi rayonunda M.Qaşqay küçəsində metal əşya ilə döyüblər.

AMDP 1994-cü ildə yaradılıb. Fəaliyyətinin ilk illərində partiya hökuməti dəstəkləyib, daha sonra isə müxalifətə keçib. N.Pənahlı SSRİ-nin dağılmasından sonra Milli Azadlıq Hərəkatının rəhbərlərindən biri olub, 1993-cü ildə dövlət müşaviri vəzifəsinə təyin edilib, 1994-cü ildə isə bu vəzifədən azad edilib. ANSPRESS