Dumanlı hava şəraitinə görə Heydər Əliyev Beynəlxalq Hava Limanı bu gecə saat 01:30 radələrindən səhər saat 09:30-dək uçuşlar üçün bağlı qalıb. "Azərbaycan Hava Yolları" QSC-nin xidmət rəisi Məhərrəm Səfərlinin ANS PRESS-ə verdiyi məlumata görə, bu səhər saatlarında Aktau-Bakı, İstanbul-Bakı, Tehran-Bakı, Moskva -Bakı, Həştərxan-Bakı aviareysləri görmə məsafəsinin zəifliyi ilə bağı Bakıya enə bilməyiblər. Bu səbəbdən 5 təyyarə Gəncə hava limanına enib.

Gəncə aeroportunun rəisi Bəylər Nəcəfov ANS-ə bildirib ki, Gəncə hava limanına saat 04:30-da Moskva, 05:03-də Həştərxan, 05:52-də İstanbul, 07:17-də Aktau sərnişin təyyarəsi və saat 09:27-də Əfqanıstanın Qəndəhar şəhərindən gələn yük hava gəmisi eniş edib. Bakıda Heydər Əliyev Beynəlxalq Hava Limanı öz işini bərpa edən kimi bütün sərnişin təyyarələri saat 10:00 radələrində paytaxta yola salınıb.

B. Nəcəfovun sözlərinə görə, Almaniyaya yük daşıyan Əfqanıstana məxsus təyyarə isə Gəncə aeroportunda yanacaq doldurduqdan sonra öz yoluna davam edəcək. ANSPRESS