Yevlaxda minik avtomobili sərnişin avtobusu ilə toqquşub. Aran-Mingəçevir yolunun 8-ci kilometrliyində sərnişin avtobusu yoldan çıxaraq aşıb, xəsarət alanlar var. Bakı sakini, 1988-ci il təvəllüdlü Səbuhi Ağayev idarə etdiyi 10-EM-878 dövlət nömrə nişanlı “Mercedes” markalı minik avtomobili ilə yüksək sürətlə hərəkətdə olarkən ötmə əməliyyatını düzgün aparmadığından maşını qarşıdakı avtobusun sol qabaq təkərinə çırpıb. Zərbənin təsiri nəticəsində Yevlax sakini, 1958-ci il təvəllüdlü Teyyub Süleymanovun idarə etdiyi 66 AC 134 dövlət nömrə nişanlı “KAVZ 3270” markalı sərnişin avtobusu yoldan çıxaraq aşıb. Hadisə nəticəsində avtobusda olan 22 sərnişin müxtəlif dərəcəli bədən xəsarətləri ilə Mingəçevir şəhər Mərkəzi Xəstəxanasının travmatologiya şöbəsinə yerləşdirilib.

Məlumata görə, avtobusda olan sərnişinlərin hamısı Yevlax rayonun Hürüuşağı kənd sakinləri olub. Onlar Gəncə şəhərinə yas mərasiminə gedərkən qəzaya düşüblər. Baş vermiş hadisə ilə bağlı Yevlax rayon Polis Şöbəsində araşdırma aparılır.