Azərbaycan əslli Türkiyə vətəndaşı 58 yaşlı Qələndər Bayramlı Xocalı soyqırımına etirazını bildirmək üçün novruz bayramında (21 mart) Ankaradan Bakıya yürüşə başlayıb. Yürüşün 15-ci günündə 420 km yol qət edən Bayramlı Türkiyənin Sivas vilayətinə çatıb. Hədəfinin 2 ay sonra Bakıya çatmaq olduğunu deyən Qələndər Bayramlı məqsədinin ermənilərin törətdiyi qətliamları bütün dünyaya çatdırmaq olduğunu qeyd edib.

“Bu yürüşü 1992-ci ildə qətliam törədən ermənilərə etiraz etmək üçün həyata keçirirəm. Türklər heç bir vaxt insanları qətlə yetirməyib, ermənilər yetirib. Bunu dünyaya eşitdirmək üçün 2 800 km yol qət edəcəyəm. Hər gün maksimum 35 km gedə bilirəm. Təhlükəsizlik səbəbilə gecələri yürüşə davam etmirəm və çatdığım yerdə gecələyirəm. İnşallah 2 ay sonra məqsədimə çatacağam. Bu asan olmayan, amma haqlı bir yürüşdür və mənim üçün yorucu deyil. Azərbaycan şəhidlərinin xatirəsini hörmətlə yad edirəm. Ermənilər torpaqlarımızı tərk etsin və getsin. Şəhidlərimizin qanı yerdə qalmayacaq”.

Yürüşdən əvvəl işlədiyini deyən Bayramlı işdən çıxdığını, yol boyu insanların ona dəstək verəcəyinə ümid etdiyini bildirib.