Ötən gün Xaçmaz şəhəri ərazisində 2 nəfərin xəsarət alması ilə nəticələnən yol nəqliyyat hadisəsi baş verib. Baş Dövlət Yol Polisi idarəsinin istintaq və təhqiqat bölməsinin rəisi polis mayoru Əhməd Nəcəfovun ANS PRESS-in bölgə müxbirinə verdiyi məlumata görə, Xaçmaz şəhər sakini Elçin Cəfər oğlu Əliyarov Alı Mustafayev küçəsində idarə etdiyi “Nissan” markalı 27 BX 415 dövlət nömrə nişanlı avtomobili yol kənarındakı binaya vurub. Nəticədə sürücü və yanındakı sərnişin yaralanıb. Sürücünün aldığı xəsarət ağır olduğu üçün o, Xaçmaz rayon Mərkəzi Xəstəxanasına çatdırılıb.

Xəstəxananın travmotologiya şöbəsinin müdiri Ağayar Quliyevin ANS PRESS-in bölgə müxbirinə verdiyi məlumata görə, xəstə ağır kəllə-beyin travması ilə daxil olub. Ona dərhal tibbi yardım göstərilib, hazırda şöbədə mülicə alır və həyatı üçün təhlükə yoxdur.

Qeyd edək ki, Elçin Əliyarov idarə etdiyi “Nissan” markalı avtomobili bir neçə gün bundan əvvəl lotereyada udubmuş.