Qəzada ölən hərbçilərimizin sayı 5-ə çatdı

Lənkəran şəhər hərbi hospitala yerləşdirilən hərbi qulluqçulardan daha biri vəfat edib. Bölgə müxbirimizin verdiyi məlumata görə, bu, 1989-cü il təvəllüdlü, Cəbrayıl Rayon Hərbi Kommisarlığından həqiqi hərbi xidmətə çağırılmış əsgər Qurbanov Elçin Lələkişi oğludur.

Baş vermiş qəza ilə bağlı Lənkəran hərbi prokurorluğunda CM-nin 351-ci maddəsi ilə cinayət işi açılıb. Faktla bağlı araşdırma aparılır.

Beləliklə, qəza nəticəsində ölən hərbçilərin sayı 5-ə çatıb. 4 nəfər isə yaralıdır.

Xatırladaq ki, dünən Lerik rayonu ərazisində içində 18 əsgər olan 04-63 SQ nömrə nişanlı "Qaz-66" markalı hərbi maşın aşaraq dərəyə yuvarlanıb. Hadisə təxminən saat 15.30 radələrində Lənkəran-Lerik magistralının 45-ci kilometrində, Lerikin Yeni Günəşlı kəndi ərazisindəki yüksək dağlıq ərazidə baş verib.

Onu da əlavə edək ki, qəzaya uğrayan maşında Sərhəd Qoşunlarının hərbi xidmətdən təxris olunan əsgərləri olub. ANSPRESS