Misli Premyer Liqasının VIII turunun mərkəzi oyununda oktyabrın 17-də Tofiq Bəhramov adına Respublika stadionunda “Qarabağ” və “Neftçi” 3:3 hesabı ilə heç-heçə edib. İki qollu üstünlüyü qoruya bilməyən paytaxt klubu bərabərlik qolunu əlavə vaxtda buraxıb, turun nəticələri isə “Sabah”ı turnir cədvəlinin zirvəsinə çıxarıb.
Klisman dubl etdi, “Qarabağ” son anda xilas oldu
Hesabı 11-ci dəqiqədə Qustavo Klisman açıb. Ağdam klubu cavabı çox gecikdirməyib: 18-ci dəqiqədə Aleksey Kaşuk hesabı bərabərləşdirib. 34-cü dəqiqədə Klisman dublunu rəsmiləşdirərək “ağ-qaralar”ı yenidən önə çıxarıb. Birinci hissənin sonunda Zakaria Savonun vurduğu top ofsayd səbəbindən qeydə alınmayıb.
Ehtiyatdan meydana daxil olan Draqolyub Saviç 52-ci dəqiqədə hesabı 3:1 edib, onun 58-ci dəqiqədə vurduğu daha bir qol isə sayılmayıb. Matçın sonunda “Qarabağ” təzyiqi artırıb: ehtiyatdan çıxan Renaldo Sefas 88-ci dəqiqədə fərqi azaldıb, əlavə vaxtda isə Kadi Borqes hesabı 3:3-ə gətirib. Oyunu Kamal Umudlu idarə edib, VAR-da Əli Əliyev çalışıb.
Heyətlər: qapıda gözlənilməz dəyişikliklər
“Qarabağ” matça Şahruddin Məhəmmədəliyev (k), Marko Yankoviç, Kadi Borqes, Mateus Silva, Bruno Lanqa, Zakaria Savo, Cebrail Makreçkis, Aleksey Kaşuk, Jali Muaddib, Pedro Bikalyo və Bense Varkonyi ilə başlayıb. “Neftçi”nin start heyətində Rza Cəfərov, Rüfət Abbasov, Falaye Sako (k), İqor Ribeyro, Endryu Qravilyon, Lyubomir Tupta, Breno Almeyda, Adeleke Akinyemi, Qustavo Klisman, Viçko Şevel və Alen Şkribek yer alıb.
Qurban Qurbanov uzun fasilədən sonra Şahruddinə şans verməsini Martin Zlomisliçin iki gün əvvəl zədələnməsi ilə izah edib. Yuri Vernidub isə əsas qapıçı Emil Balayevin 38 dərəcə hərarəti olduğunu, buna görə qapını Rza Cəfərovun qoruduğunu bildirib. Baş məşqçi qapıçı səhvlərinə görə transfer etmədiklərinə peşman olmadığını, yerli qapıçılar üzərində işləməyin daha faydalı olduğunu deyib.
Məşqçilər: “Heç kim məğlubiyyətə layiq deyildi”
Qurbanov mətbuat konfransında hər iki komandanı təbrik edib: “Tribunalarda fantastik atmosfer var idi və sırf azarkeşlər üçün oynanılan bir matç izlədik. Düşünürəm ki, komandalardan heç biri bu gün məğlubiyyətə layiq deyildi”. O, “Neftçi”nin çempionluq uğrunda real iddiaçı olduğunu etiraf edib, yeni transferlərin hələ tam uyğunlaşmadığını və zədə problemləri yaşadığını vurğulayıb.
Vernidub isə nəticədən narazı qalıb: “Son 2 oyunda 4 xal itirdik. Xüsusilə də, bu gün”. Ukraynalı mütəxəssis çempionatın dörddə birinin geridə qaldığını, qarşıda 25 oyun olduğunu xatırladıb və əlavə edib: “Futbol şahmat kimidir. Topu qabağa vurmaqla bitmir”.
Üçlü bərabərlik pozuldu: “Sabah” öndə
Turdan əvvəl “Neftçi”, “Sabah” və “Qarabağ” 16 xalla bərabər idi. Günün ilk oyununda “Sabah” Qəbələdə yerli komandanı 4:0 hesabı ilə məğlub edib: Abdula Xaybullayev (45+1), Aleksey İsayev (74, 90+3) və Coy Lens Mikels (88) fərqləniblər. Beləliklə, Valdas Dambrauskasın komandası 19 xalla liderliyə yüksəlib. 17 xalı olan “Neftçi” topların daha yaxşı fərqinə görə ikinci, eyni xala malik “Qarabağ” üçüncüdür. Ağdam klubunun “Neftçi” ilə müqayisədə bir oyunu azdır.
Turun oktyabrın 16-da keçirilən oyunlarında “Şamaxı” 0:2 geri düşdükdən sonra “Şəfa”nı 3:2 hesabı ilə məğlub edib, qələbə qolunu son dəqiqədə Rikardo Apolinario penaltidən vurub. “Sumqayıt” isə evdə “Araz-Naxçıvan”a 2:1 hesabı ilə qalib gəlib: Ronaldo Vaskez və Nihad Əhmədzadə fərqləniblər. VIII tur oktyabrın 18-də “Turan Tovuz” – “İmişli” və “Kəpəz” – “Zirə” oyunları ilə yekunlaşacaq.
Hər iki klubun 1000-ci oyunu
Derbi öncəsi PFL Azərbaycan çempionatlarında 1000-ci oyununu keçirmiş hər iki kluba xatirə hədiyyəsi təqdim edib. Mükafatları PFL-in texniki-idman direktoru Elgiz Abbasov “Qarabağ”ın lisenziyalaşdırma üzrə meneceri Şahid Həsənova və “Neftçi”nin veteranı, seleksiya məşqçisi İqor Getmana verib.
Oyundan sonra stadionun qarşısında bəzi azarkeşlər işıq fişəngi atıb, DİN isə insident törətməyə cəhd göstərən 19 nəfərin saxlanıldığını açıqlayıb.
Mənbə: APA Sport
Şərhlər