Paytaxtın Xətai rayonu ərazisində hərəkətdə olan avtomobilin təkərlərindən birinin qəfildən sıradan çıxması yol qəzasına səbəb olub. Hadisə bu gün günorta saatlarında Nobel prospektində qeydə alınıb. Qəza zamanı sürücü Zeynalov Əli Zeynalabdın oğlunun şəhərdən Suraxanı rayonu istiqamətində idarə etdiyi “Mercedes” markalı avtomaşın onunla eyni istiqamətdə hərəkətdə olan və Məmmədəliyev Yaqub Fəxrəddin oğlunun idarə etdiyi “Qaz 2410” markalı digər minik maşınına çırpılıb. Nəticədə “Mercedes” markalı avtomaşının sürücüsü Əli Zeynalov baş nahiyəsindən xəsarət alaraq, xəstəxanaya çatdırılıb. Onun xəsarətləri yüngül dərəcəli olduğundan göstərilən ambulator müalicədən sonra evə buraxılıb.

Faktı Xətai rayon Polis İdarəsinin və Dövlət Yol Polis şöbəsinin əməkdaşları araşdırır. İlkin olaraq hadisə yerinə gələn hüquqmühafizə orqanı əməkdaşları tərəfindən yol nəqliyyat hadisəsinin baş verdiyi ünvanda müayinələr aparılaraq, sürücülərin ifadələri alınıb və həmçinin müvafiq protokol tərtib edilib.

Sürücülərin üzərində aparılmış alkoqol sərxoşluğu müayinəsinin və eləcə də fakt üzrə təyin olunacaq avtotexniki ekspertizanın yekun rəylərindən sonra, yol qəzasının dəqiq təfərrüatı barədə fikir söyləmək mümkün olacaq.

Qeyd edək ki, qəzaya uğramış minik maşınları cərimə meydançasına aparılan zaman, “Volqa” markalı avtomaşının yanacaq çəni deşildiyindən, yanacaq ətrafa yayılıb. Baş verə biləcək xoşagəlməz hadisələrin qarşısını almaq məqsədilə dağılmış yanacağın üzəri torpaqla örtülüb. ANSPRESS