Yasamal rayonu İnşaatçılar prospektində yol nəqliyyat hadisəsi baş verib. Qəza zamanı Əsəd Məmmədova məxsus “Mercedes” markalı avtomaşın idarəetmənin itirilməsi nəticəsində yolun kənarındakı ağaclara çırpılıb. Toqquşma nəticəsində nəqliyyat vasitəsində yanğın baş verib.

Qeyd edək ki, yanğın başlamadan əvvəl sürücü və maşında olan iki sərnişin - Rəşad və 15 yaşlı Zaur Bayramov hadisə şahidlərinin köməkliyi ilə vaxtında avtomobildən çıxarılıb. Sürücü və sərnişinlər təcili tibbi yardım maşınları ilə 1 saylı şəhər klinik xəstəxanasına çatdırılıb.

Xəstəxanadan verilən məlumata görə, hər 3 yaralıya təcili tibbi yardım göstərilib və onların vəziyyəti normaldır.

Qəzadan sonra alışan avtomaşın isə əraziyə çağrılmış Yasamal rayon yanğından mühayizə xidmətinin əməkdaşları tərəfindən söndürülüb. Alovun ətraf ərazilərə keçməsinin qarşısı vaxtında alınıb.

Qəzanın baş vermə səbəbləri isə Yasamal rayon polis idarəsinin əməkdaşları tərəfindən araşdırılır. Yol nəqliyyat hadisəsi ilə bağlı təyin ediləcək ekspertizaların rəyi alındıqdan sonra qəzaya hüquqi qiymət veriləcək.