Bakıda iki nəfərin ölümcül yaralanması ilə nəticələnən yol-qəza hadisəsi baş verib. Hadisə şahidinin ANS PRESS-ə verdiyi məlumata görə, hadisə bu gecə saat 04.00 radələrində Nərimanov rayonu, Montin qəsəbəsində qeydə alınıb.

Belə ki, “BMW” markalı minik maşını qarşı tərəfdən gələn “Kia Rio” markalı maşınla toqquşub. Zərbənin təsirindən “Kia” yoldan çıxaraq kənardakı dirəyə çırpılıb. Dirək isə “BMW”-nin üstünə aşıb.

Kliniki Tibbi Mərkəzdən ANS PRESS-ə bildiriblər ki, qəza zamanı hadisə yerindən təcili tibbi yardım maşını ilə iki nəfər - 18 yaşlı Rövşən Məmmədov və 43 yaşlı Ramin Məmmədov xəstəxanaya gətirilib. Hər iki yaralıya kəllə-beyin travması və bədənin müxtəlif nahiyələrdəki xəsarətlər diaqnozu qoyularaq reanimasiya şöbəsinə yerləşdirilib. Onların vəziyyətinin orta-ağır olduğu bildirilir.

Faktla bağlı rayon Polis İdarəsində araşdırma aparılır.