Ötən gecə Bakının Səbail rayonu ərazisində sərnişin avtobusu qəzaya uğrayıb. Avtobusla minik maşınının toqquşması ilə meydana gələn qəza Badamdar qəsəbəsində, Badamdar-Bayıl yolunda qeydə alınıb. Azad Gəncəliyevin 5 saylı xətt marşrutu üzrə idarə etdiyi “BMC” markalı sərnişin avtobusu Badamdar-Bayıl enişi ilə hərəkətdə olan zaman Usubov İlham Mirseyid oğlunun idarə etdiyi “VAZ 2106” markalı avtomobil də əks istiqamətdə gəlirmiş. Ancaq minik maşınının gözlənilmədən sərnişin avtobusunun yoluna çıxması hadisəni qaçılmaz edib.

Qeyd edək ki, hadisə zamanı ictimai nəqliyyatda çox sayda sərnişin olsa da onlardan xəsarət alan olmayıb. Minik maşınını idarə edən İlham Usubov isə xəsarət alaraq xəstəxanaya çatdırılıb. Yol qəzasının baş verdiyi ünvana Səbail rayon polis idarəsinin əməkdaşları, yol patrul xidməti müfəttişləri gəlib. Müəyyən müayinələr aparılıb. İlkin ehtimala görə isə hadisənin jiqulinin sürücüsünün ani səhvi ucbatından meydana gəldiyi güman olunur. Onun qarşıdan gələn nəqliyyat vasitələrinin yoluna çıxdığı istisna edilmir.