Fövqəladə Hallar Nazirliyi Bakıda ictimai asayişi pozan kişini yaxalamağa kömək edib. ANS PRESS-in nazirliyin rəsmi saytına isitnadla verdiyi məlumata görə, “112” qaynar telefon xəttinə Bakı şəhəri, Binəqədi rayonunda 1961-ci il təvəllüdlü kişinin ictimai asayişi pozması, polis əməkdaşlarının həmin şəxsi zərərsizləşdirərkən onun qaçaraq mənzilinin qapısını içəridən bağlaması barədə məlumat daxil olub.

Hadisə yerində əməliyyat şəraiti qiymətləndirilərkən məlum olub ki, vətəndaş polis əməkdaşlarıın tələblərinə tabe olmur. Xilasedicilər təhlükəsizlik qaydalarına riayət etməklə xüsusi alət və avadanlıqlar vasitəsilə doqquzmərtəbəli yaşayış binasının 1-ci mərtəbəsində yerləşən mənzilin giriş qapısını bayır tərəfdən açaraq hüquq-mühafizə orqanlarının əməkdaşlarının mənzilə daxil olmalarına şərait yaradıb.