Bakı-Quba yolunun 55-ci kilometrliyində, Xızı rayonunun Yeni Yaşma kəndinin ərazisindən keçən hissəsində naməlum qadın meyiti aşkar edilib. Xızı rayon polis şöbəsindən ANS PRESS-in bölgə müxbirinə verilən məlumata görə, qadının gecə saatlarında yolu keçmək istəyərkən hələlik müəyyən edilməmiş avtomobil tərəfindən vurulduğu ehtimal edilir.

Polisin verdiyi məlumata görə, meyitin üzərindən çoxlu avtomobil keçdiyi üçün tanınmaz hala düşüb. Polislər yalnız dırnaqlarındakı boyadan meyitin qadın cinsinə mənsub insan olduğunu müəyyənləşdiriblər. Artıq Fövqəladə Hallar Nazirliyinin əməkdaşları da hadisə yerinə cəlb ediliblər.

Meyitin Sumqayıt morquna aparılacağı bildirilir. Faktla Xızı rayon polis şöbəsində təhqiqata başlanılıb. Meyitin kimliyi və qadını vuran maşının kimə məxsus olması araşdırılır.