Azərbaycanın Quba rayonu ərazisində ölümlə nəticələnən yol qəzası baş verib. Baş Dövlət Yol Polisi İdarəsinin istintaq və təhqiqat idarəsinin müstəntiqi Arzu Əliyevin ANS PRESS-in bölgə müxbirinə verdiyi məlumata görə, hadisə Bakı-Quba-Rusiya sərhədi yolunun 178 kilometrliyində, Quba rayonunun Susay Qışlaq kəndi ərazisində qeydə alınıb. 43 yaşlı Masallı sakini Elşad Sabir oğlu Əzimovun idarə etdiyi və Rusiyadan Bakıya minik maşınlarının daşınması isə məşğul olan “MAN” markalı yük maşını Quba istiqamətində hərəkət edərkən Susay Qışlaq kəndinin 43 yaşlı sakini İmran İmaməddin oğlu Özbəyovun idarə etdiyi “QAZ-69” markalı digər yük maşını yola çıxaraq, ona çırpılıb. Zərbə “MAN” markalı maşının ban hissəsinə tuş gəlib. Hadisə nəticəsində İmran Özbəyov hadisə yerində dünyasını dəyişib.

Ölən sürücünün meyiti Quba morquna aparılıb və ekspert müayinəsindən sonra ailəsinə təhvil veriləcək. Hadisənin səbəblərinin müəyyənləşdirilməsi üçün araşdırma aparılır.