Ötən gecə Bakının Qaradağ rayonu Lökbatan qəsəbəsində qanlı hadisə baş verib. Ağcəbədi rayon sakini 26 yaşlı Alışov Namiq Şakir oğlu meyvə-tərəvəz məhsullarının topdan satıldığı bazarda bıçaq xəsarətləri yetirilərək 1 saylı şəhər klinik xəstəxanasına çatdırılıb. Cərrahi əməliyyatdan sonra Namiq Alışovun həyatı xilas edilib.

Faktla bağlı dərhal Qaradağ rayon polis idarəsi və 10-cü polis bölməsinə məlumat verilib. Polislər hadisə ilə bağlı zərərçəkmişin izahatını alıb və o, tanımadığı bir şəxs tərəfindən bıçaqlandığını bildirib.

Hazırda Qaradağ polisi tərəfindən Namiq Alışovu bıçaqlayan şəxsin tutularaq məsuliyyətə cəlb edilməsi istiqamətində əməliyyat-iatintaq tədbirləri davam etdirilir. Qeyd edək ki, zərərçəkən Namiq Alışov yük maşını sürücüsüdür və o, hadisənin baş verdiyi bazara mal gətiribmiş.