Türkiyədə silahlı hücuma məruz qalan məşhur müğənni İbrahim Tatlısəs iflic ola bilər. ANS PRESS CNN Türk-ə istinadən xəbər verir ki, bu barədə sənətçinin yerləşdirildiyi Muslak Acıbadem xəstəxanasının baş həkimi Çağlar Cuhadaroğlu məlumat verib.

“Sənətçinin bədəninin bir hissəsi iflic ola bilər. Ona neçə güllə dəydiyini deyə bilmərəm, amma bilirəm ki, güllələrdən biri baş nahiyəsinin arxa tərəfindən girərək ön tərəfdən çıxıb. Müğənni xəstəxanaya gətiriləndə başında sağ kəllə sümüyünüdə qırıntılar var idi. Beynində baş verən qanaxmanı saxlamaq üçün 5 saat ərzində cərrahiyyə əməliyyatı olundu. Burun nahiyəsində də güllə izi var. Tatlısəslə yanaşı onun köməkçisi də boğazından güllə yarası alıb. Onun vəziyyəti müğənniyə nisbətən daha yaxşıdır. İkisinə də plastik əməliyyat edilib", -deyə həkim sözlərini tamamlayıb.

Hadisə ilə bağlı son məlumatlar da əldə olunub. Silahlı hücum müğənni və köməkçisi gecə saatlarında Şişli rayonundakı “Nurol Plaza”da həyata keçirilən “Beyaz” TV-dəki İdo Şov proqramının çəkilişindən çıxanda baş verib. Tatlısəs maşınına oturarkən yolun əks tərəfində dayanan tünd rəngli maşından uzun məsafəli silahla atəşə tutulub. Araşdırma aparan polis İbrahimin maşınında 4 və yaxın binalarda 4 güllə izi aşkar edib. Ümumilikdə isə olay yerindən 11 güllə gilizi tapılaraq aktlaşdırılıb.

Jurnalist İlhamə Qasımlının sözlərinə görə, müğənniyə qarşı sui-qəsdin baş verməsi ilə bağlı 3 versiya səsləndirilir.

I- siyasətə qoşulan İbrahim Tatlısəsin nüfuzu böyük olduğundan siyasi rəqibləri onu aralarında görmək istəmir,

II- PKK izidir, çünki hadisə yerindən tapılan giliz və güllələrin aid olduğu “Kalaşnikov” silahından daha çox PKK-çılar istifadə edir,

III İbonun Şimali İraqda tikinti sektoruna girməsidir. Belə ki, müğənninin ilyarım əvvəl bu ölkədə tikinti sahəsinə böyük məbləğdə vəsait qoyması bəzi tikinti sahibkarlarını narahat edir.

Hazırda polis araşdırmaları davam etdirir. Son məlumatlara görə, hadisəni törədənlər ən azı 2 nəfər olub.

Ölkənin baş naziri Rəcəb Təyyib Ərdoğan xəstəxana rəhbərliyi ilə biibaşa əlaqə saxlayaraq, "İmperator"un səhhəti ilə yaxından maraqlanıb. Xəstəxana rəhbərliyinə 4 dəfə zəng edən baş nazir xəstənin yaxşılaşması üçün lazım olan bütün tədbirlərin görülməsini tapşırıb.

Hadisə şahidləri isə sənətkarın yaralandıqdan sonra dediyi son sözləri açıqlayınlar. Onların sözlərinə görə, qan içində yerdə yatan İbrahim Yatslısəs qırıq-qırıq, amma düzgün tələffüzləbelə deyib: “Olurmu yaaa? Olurmu hiç?”.

Hələlik "İmperator"un bu sözləri nə mənada dediyi bilinmir.