Ənənəvi olaraq, "Oskar" mükafatının təqdim edilməsindən bir gün əvvəl təqdim edilən "Qızıl Moruq" mükafatına isə "Alatoranlıq" film-saqasının sonuncu hissəsi layiq görülüb. Ən pis filmlərə verilən anti-Oskar mükafatı sözügedən filmi 7 nominasiyada qalib edib.

"Alatoranlıq. Sökülən Dan Yeri. 2-ci hissə" adlı filmin rejissoru Bill Kondon ən pis rejissor, filmdə baş rolu ifa edən Kristen Stüart ən pis aktrisa, onun tərəf müqabillərindən biri olan Teylor Lotner isə ən pis aktyor adlandırılıb. "Alatoranlıq" film-saqasının bütün aktyorları birlikdə isə "ən pis aktyor ansamblı" nominasiyasında da "Qızıl Moruğa" layiq görülüblər.

Ən pis ssenari nominasiyasında aktyor Adam Sendlerin həm də baş rolda çəkildiyi "Xudahafiz ata" komediyası fərqlənib. Ən pis ikinci dərəcəli qadın roluna görə isə "Dəniz döyüşü" filmində çəkilən müğənni Rihanna "Qızıl Moruq" alıb.

Qeyd edək ki, "anti-Oskar" adlandırılan "Qızıl Moruq" mükafatı 1980-ci ildən təqdim edilir.