Müğənni Rəqsanənin Türkiyədə məhşurlaşmaq istəyən sənətçilərimiz haqqında danışarkən, jurnalistin sualına cavab olaraq, - “Mən Aygünü də, Röyanı da çox sevirəm. Amma gəlib Türkiyədə bir mahnı oxuyub, klip çəkdirməklə tanınmaq olmur. Gərək uzun müddət burada qalasan” söyləməsi müğənni Röyanın kəskin etirazına səbəb olub. ANS PRESS-in məlumatına görə, ötən gün “Rəqsanəni hamı tanıyır” başlıqlı yazıda sənətçi həmkarının onun zəhmətini yerə vurduğunu vurğulayıb.

Rəqsanə ajiotaj yaradan bu məsələyə aydınlıq gətirməyi zəruri bildirib: “Mən hec kimin əziyyətini yerə vurmuram. Mövzuya məntiqli cavab vermişəm. Türkiyə 80 milyonluq əhalisi olan bir ölkədir. Orada tanınımaq üçün bir-iki mahnı və klip yetərli deyil. İllərlə yaşayıb, dayanmadan çalışıb, böyük işlər görməlisən ki, kütləyə özünü tanıdasan. Bu gün bu başlanğıcı hələki Röya, Aygün Kazımova və bəzi məhşurlarımız edib. Mən onların uğuruna sevinirəm. Bundan artıq yeniliklər etməyini gözləyirəm” – deyən sənətçi xanım Röyanın “Rəqsanəni hamı tanıyır” fikrinə münasibətini də öyrəndik.

“Bəli, hamı məni tanıyır. Müğənniyəm, iki övladım var. Bəlkə, sujetlərdə mənim Röya ilə qalmaqal yaratmaq istədiyim hiss olunub. Mən nəinki normal münasibətdə olduğum Röya ilə, heç kimlə qalmaqal düşünmürəm. Əvvəllər mahiyyətinə varmadan bəzi qalmaqallarda adımı hallandırmışam. Bu gün heç kimlə qalmaqal etmək fikrim yoxdu. Dayanmadan Türkiyədə həllini tapan layihələrim üzərində çalışıram. Qalan vaxtımı ailəmə ayırıram. İnanın, yerli şou-biznesdə baş verən qalmaqallar məni maraqlandırmır.

Röya ilə uzun müddət yol yoldaşı olmuşuq, səfərlərdə bir yerdə qalmışıq. Onun sənəti, özü haqqında mövqeyim hər zaman müsbət olub. İndi də elədir. Mənim yuxarıda qeyd edilən mövzu barəsində, konkret fikrim budur ki, sənətçilərimiz bu qədər zəhmətin müqabilini görə bilsin. Türkiyənin 5-10 faizi yox, böyük bir hissəsi onları tanısın. Buna sevinərəm və hər birinə bacardığım qədər dəstək olaram”.