ABŞ-ın Nyu-York şəhərinin “Millenium” teatrında dünya şöhrətli müğənni İştar Alabinanın geniş konsert proqramı təqdim olunacaq. ANS PRESS-in məlumatına görə, martın 16-da baş tutacaq konsertdə azərbaycanlı rəqqas, əməkdar artist Tahir Eynullayev də iştirak edəcək. Azərbaycan Dövlət Mədəniyyət və İncəsənət Universitetinin müəllimi Tahir Eynullayev konsertdə milli rəqslərimizdən “Bəy”, “Turac”, eləcə də “Kasablanka” “Yəhudi” və digərlərini təqdim edəcək.

T.Eynullayev həmçinin Nyu-York şəhərində həmvətənlərimiz üçün təşkil olunacaq konsert proqramında iştirak edəcək. Konsertdən sonra o, şəhərin ən böyük ali təhsil ocaqlarından birində tələbələrə ustad dərsləri keçəcək.



Qeyd edək ki, tanınmış rəqqasımız bundan əvvəl ABŞ, Böyük Britaniya, İsveç, İtaliya və Türkiyədə keçirilmiş beynəlxalq yarışlarda ölkəmizi layiqincə təmsil edib.

Xatırladaq ki, İştar Alabina ötən əsrin 90-cı illərinin sonlarından tanınmağa başlayıb və hazırda müasir estrada janrının ən parlaq simalarından biridir. Nadir vokal diapazonu, pop musiqisini özündə əks etdirən qeyri-adi üslubu ilə seçilən müğənni İştar Alabina beynəlxalq musiqi arenasının misilsiz incisi kimi məşhurdur. İndiyədək dünyanın müxtəlif ölkələrində milyonlarla albomu satılıb. Mənşəcə İsrailli olan məşhur müğənni bir sıra mükafatların laureatı olub və çoxsaylı uğurlara imza atıb. Dünya şöhrətli müğənninin müxtəlif vaxtlarda işıq üzü görmüş musiqi albomları dünya xit-paradlarında birinciliyə yüksəlib.