SSRİ xalq artisti Alla Puqaçova dünən hamıdan xəlvəti yumor aktyoru Maksim Qalkinlə VVAQ idarəsində rəsmi nikaha girib. ANS PRESS-in Rusiya KİV-lərinə istinadən verdiyi məlumata görə, 10 il vətəndaş nikahında olan 62 yaşlı Primadonna ilə orientasiyasının düzgün olmadığı haqqında şayiələr gəzən 35 yaşlı şoumen nəhayət münasibətlərini rəsmiləşdiriblər. Bu xəbəri ilk dəfə Nikolay Baskov "Tvitter" səhifəsində yazıb:

"Onlar bu gün qol çəkdilər. Sabah isə toyda kef edəcəyik. Dostlar, bu sensasiyanı birinci xəbər verən mənəm. Mənim yaxın dostum bu gün evləndi! Ura! Sabah doyunca içəcəyik!"
Baskovun "Tvitter"ində Maksimin barmağında nişan üzüyü ilə fotosu da qoyulub. Maksim fotoda nigah müqaviləsini xatırladan bir yığın vərəqi diqqətlə oxuyur.



Toy bu gün-24 dekabrda bəyin istəyi ilə italyan mətbəxi olan "Olivetta" restoranında olacaq. Toyun eksklüziv işıqlandırılması artıq yüksək məbləğə jurnalların birinə satılıb. Jurnal mərasimin və banketin xərclərini ödəyəcək.

Qonaqların siyahısını gəlin tərtib edib. Toya Nikolay Baskov (o, VVAQ-da bəy tərəfdən şahid olub), Kristina Orbakayte, Filipp Kirkorov, modelyer Valentin Yudaşkin, Aleksandr Buynov, prodüser Yana Rudkovskayanın və yeni cütlüyün ən yaxın dostları ilə birlikdə 40 nəfər dəvət olunub. Deyilənlərə görə, Rusiya prezidenti Dmiitri Medvedyev və biznesmen-siyasətçi Mixail Proxorov da toya dəvət olunublar.

Bu, Alla Puqaçovanın beşinci nigahı olacaq. O, artıq sirk artisti Mikolas Orbakasla, rejissor Aleksandr Stefanoviçlə, prodüser Yevgeniy Boldinlə, müğənni Filip Kirkorovla evli olub. Maksim Qalkin isə əvvəllər evli olmayıb və heç vaxt, heç bir qadınla əlaqəsi müşahidə olunmayıb.

Alla Puqaçova və Maksim Qalkin son vaxtlar birlikdə Moskvanın Qryaz vilayətindəki qəsrdə yaşayırlar. Maksim yəhudi əsillidir, Alla Puqaçovanın isə bir tərəfli yəhudi əsillidir. Primadonna pravoslav olsa da, bəzi mənbələrə görə bəy yəhudi dininə ibadət edir. Puqaçovanın Filipp Kirkorovla olan əvvəlki nigahından fərqli olaraq kilsədə nigah mərasimi nəzərdə tutulmayıb.

Cütlüyün toyu günü hadisələrlə zəngindir. 24 dekabrda Moskvanın akademik Saxarov prospektində Putinə qarşı kütləvi mitinq keçiriləcək. Bir tərəfdən isə Puqaçovanın ən yaxın həmkarı və qəyyumu Sergey Savin ağır yol qəzasından sonra xəstəxanada yatır və Promadonna ona görə narahatlığını bildirib.