Məşhur britaniyalı musiqiçi, “The Beatles” qrupunun keçmiş üzvü Pol Makkartni üçüncü dəfə evlənmək niyyətindədir. Bu barədə məlumatı BBC-yə musiqiçinin agenti Stüart Bell verib.

68 yaşlı Pol Makkartninin evlənmək istədiyi qadın Nyu-Yorkdan olan 51 yaşlı iş adamı Nensi Şevelldir. Cütlük dörd ildir görüşür. Gözlənilən toyun vaxtı, yeri və digər təfərrüatları barədə heç bir məlumat yoxdur.


Ser Pol Makkartni iki dəfə evli olub. Onun birinci həyat yoldaşı Lindi 1998-ci ildə xərçəng xəstəliyindən dünyasını dəyişib. Sonra müsiqiçi keçmiş model Hizer Millislə evlənib və 2008-ci ildə onunla altı illik evlilikdən sonra qalmaqallı şəkildə boşanıb.

Nensi Şevellin də evlilik təcrübəsi var. O, 20 ildən artıq amerikalı hüquqşünas və siyasətçi Bryüs Bleykmenlə ailəli olub. Pol Makkartninin gələcək həyat yoldaşı Nyu-York Nəqliyyat İdarəsinin Direktorlar Şurasının üzvü, eləcə də ailə şirkətinin vitse-prezidentidir. anspress