Amerikalı məşhur müğənni Madonna müsəlmanların müqəddəs kitabı Quranı Kerimi oxuyubmuş. Bu barədə müğənni “Harper’s Bazaar” jurnalına verdiyi müsahibədə deyib. Müsahibədə səmimi açıqlamalar verən müğənni bütün müqəddəs kitabları oxumanın əhəmiyyətli olduğunu deyib.

“Hesab edirəm ki, bütün müqəddəs kitabları oxumaq əhəmiyyətlidir. Dostum Yamanın (Türk rəqqas Yaman Okur) həmişə dediyi kimi yaxşı bir müsəlman eyni zamanda yaxşı yəhudidir və yaxşı bir yəhudi eyni zamanda yaxşı bir xristiandır. Bu cəsarətli çıxışı qətiyyətlə dəstəkləyirəm”.

Qeyd edək ki, Yaman Okur Türkiyə mətbuatına verdiyi müsahibədə bir dəfə konsertdən əvvəl dua edərkən Madonnanın onu gördüyünü və bundan təsirləndiyini demişdi. Okur həmçinin Madonnaya İslam dini barədə məlumatlar verdiyini və ona Quran hədiyyə etdiyini bildirmişdi.