Məruz qaldığı silahlı hücum nəticəsində ağır yaralanan və hal-hazırda Almaniyada müalicəsi davam edən Türkiyənin məşhur müğənnisi İbrahim Tatlıses parlament seçkiləri üçün irəli sürdüyü namizədliyini geri götürüb. Tatlıses səhhətində olan problemləri irəli sürərək ölkəyə lazımi qədər xidmət edə bilməyəcəyi üçün bu addımı atdığını deyib: “Səhhətimdəki problemlərə görə ölkəmə və millətimə millət vəkili kimi xidmət edə biləcəyimdən əmin olmadığım üçün namizədliyimi geri götürürürəm. Türkiyə Cumhuriyyətinin vətəndaşı kimi sağaldıqdan sonra ölkəmə və millətimə lazımi xidməti göstərəcəyimə namusum və şərəfim üstünə and içirəm.

Bundan başqa müğənni xəstəxanada müalicə olduğu vaxt ona mənəvi dəstək verən Baş nazirə və Şanlıurfa sakinlərinə təşəkkür edib: “Başıma gələn mənfur hücumdan sonra mənəvi dəstəyini əsirgəməyən baş nazirimizə təşəkkür edirəm və keçiriləcək parlament seçkisində ona uğurlar arzulayıram. Məni tək qoymayan, həmişə mənə sahib duran, məndən dualarını əsirgəməyən sevənlərimə və Şanlıurfa sakinlərinə də təşəkkür edirəm”. ANSPRESS