Bu gün Ağır Cinayətlərə Dair İşlər üzrə Məhkəmədə hakim Mayıl Bayramovun sədrliyi ilə tanınmış reper Hüseyn Dərya (Muradov) və digər iki nəfərin məhkəməsi keçirilib. ANS PRESS-in məlumatına görə, prosesdə dövlət ittihamçısı təqsirləndirilənlərə iş istəyib. O, Hüsen Dəryaya 1 il 6 ay, Bəylər Qəmbərova 8 il, Hikmət Şahverdiyevə isə 2 il iş istəyib. Bundan əlavə prokuror təqsirləndirilənlərin narkotik vasitələrdən asılılıqları olduğu üçün onlara məcburi müalicə təyin olunmasını da istəyib.
Proses martın 10-da vəkillərin çıxışı və təqsirləndirilənlərin son sözu ilə davam etdiriləcək.
Qeyd edək ki, H. Dərya Azərbaycan Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri, psixotrop maddələri əldə etmə, saxlama və ya satma) və 228-ci (qanunsuz olaraq odlu silah, onun hissələrini saxlama), Hikmət Şahverdiyevlə Bəylər Qəmbərov 234.2.4-cü (satış məqsədilə qanunsuz olaraq narkotik vasitələri, psixotrop maddələri əldə etmə, saxlama və ya satma) maddələri ilə ittiham irəli sürülüb. H. Dərya 2008-ci il dekabrın 2-də Daxili İşlər Nazirliyinin Baş Narkotiklərlə Mübarizə İdarəsinin əməkdaşları tərəfindən saxlanılıb. Onun üzərindən narkotik vasitə və bir ədəd qaz tapançası götürülüb.

Anar Məmmədov /ANS PRESS/