Amerika Birləşmiş Ştatlarının Los-Anceles şəhərində ən nüfuzlu musiqi mükafatı olan "Qremmi" mükafatının 55-ci təqdimetmə mərasimi baş tutub. 2012-ci il üçün "Qremmi" versiyasına görə, ilin ən yaxşı mahnısı britaniyalı "Fan" qrupunun "We are young" mahnısı seçilib.

Ən yaxşı solo nominasiyasında britaniyalı müğənni Adel mükafatlandırılıb. Ötən il 6 "Qremmi" mükafatı alan 24 yaşlı müğənni bu dəfə "Set fire to the rain" hit-mahnısının canlı versiyasına görə fərqlənib.

Ən yaxşı pop-duet nominasiyasında Qotye və Kibra dueti qalib gəlib. Müxtəlif nominasiyalarda tanınmış müğənnilər Rihanna və Beyonse də "Qremmi" mükafatı alıblar.

Pol Makkartni isə öz karyerası ərzində artıq 16-cı "Qremmi" mükafatını ənənəvi pop stilində ən yaxşı vokal albom nominasiyasında alıb.

Qeyd edək ki, 1957-ci ildən təsis edilən ABŞ Milli Səsyazma Akademiyasının "Qremmi" mükafatının laureatları Akademiyanın üzvləri arasında gizli səsvermənin nəticələrinə əsasən müəyyənləşir.