"Xəbər doğrudur. Amma qorxulacaq bir şey yoxdur. Allaha şükürlər olsun sağlığımız yerindədir!" Bu sözləri xalq artisti Brilyant Dadaşova ilə birlikdə İstanbulda avtomobil qəzası keçirən məşhur balabançı Əlixan Səmədov deyib.

Azərbaycanın xalq artisti Brilyant Dadaşovanın Türkiyədə yaşayan azərbaycanlı musiqiçi, balaban ifaçısı Əlixan Səmədovla birlikdə ötən gecə İstanbulda avtomobil qəzası keçirməsi xəbəri təsdiqləndi. Əlixan Səmədov ANS PRESS-ə açıqlamasında hadisə ilə bağlı bunları söylədi:

"Brilyant xanımla birlikdə idik o gün. Mənim maşınımla studiyadan qayıdırdıq. Qarlı hava olduqundan avtomobil sürüşdü və 2 maşına dəyərək dayana bildik. Dayana bilməsəydik, daha da ağır xəsarət alardıq. Yenə də Allah saxladı..."

Qeyd edək ki, hadisə zamanı Əlixan Səmədovun idarə etdiyi avtomobildə Brilyant Dadaşovadan savayı daha iki nəfər - xalq artistinin köməkçisi və meneceri olub. Avtomobil iki maşınla toqquşsa da, içərisində olanlar yüngül xəsarətlə canlarını qurtara bilib. Sadəcə, Əlixan Səmədovun maşınının ön hissəsi ciddi zədələnib.