Brilliant Dadaşovanın Türkiyənin TMB telekanalında yayımlanan “Brilliantla Pırlantalı gecələr” verilişinin bu həftəki qonaqları qardaş ölkədə uğurla fəaliyyət göstərən, bir neçə gün əvvəl yeni albomuna təqdimat mərasimi düzənləyən balaban ifaçısı Əlixan Səmədov və müğənni Zamiq Hüseynov idi.

Verilişinə xoş xəbərlə başlayan aparıcı bildirdi ki, Əlixan Səmədovun albomu satışına görə Türkiyədə birincidir. O bunu təsdiq edən məlumatı saytdan canlı olaraq nümayiş etdirib.

Ə.Səmədov bildirib ki, albomda “Kimlər gəldi, kimlər getdi” mahnısını da oxuyub. Verilişdə bir məsələnin də üstü açıldı. Demə, bu mahnını oxumağı ona Brilliant xanım öyrədibmiş.

Onu da qeyd edək ki, Brilliant xanım şəkərbura, paxlava, qoğal, ləbləbili xonçası, səmənisi ilə Novruz bayramını verilişində yaddaqalan qeyd edib. Bayram şirniyyatlarının ləzzəti haqda ürək dolusu danışıb. Əlbəttə ki, Novruz bayramının adət-ənənələri haqda türk dövlətlərinin tamaşaçılarına geniş məlumat verib.

Verilişdə Əlixan Səmədovla Brilliant Dadaşova ilə yumurta da döyüşdürdülər. Öncədən şərt də kəsdilər. Brilliant xanım dedi ki, udsa sevdiyi parfümü ondan hədiyyə gözləyəcək. Amma Brilliant xanımın yumurtası sındı və ətri Əlixan bəyə o almalı olacaq. Zamiqə də uduzan Brilliant xanım “bu gün şansım məndən uzaq düşüb”, - dedi.
Ə.Səmədov Zamiqədə yumurta döyüşünün qalibi olub.

Həmişəki kimi verilişində “Facebook” səhifəsindəki dostlarının ismarıclarını bölüşən Brilliant Dadaşovaya Ə.Səmədov zarafatla “çox peşmanam ki, “Facebook”-dan istifadəni sənə öyrətdim. İstəyirdim ki, sosial şəbəkədən istifadə edəsən, amma orada bu qədər çox olacağını düşünmürdüm”.

Daha sonra Zamiq repertuarındakı Azərbaycan mahnılarını ifa etdi, Ə. Səmədov isə balabandakı mahir ifası ilə tamaşaçılara əsl musiqi ziyafəti yaşatdı.

Qeyd edək ki, martın 23-də Brilliant Dadaşova İstanbulda Azərbaycan musiqi sevərləri üçün konsert verəcək.
Xatırladaq ki, “Brilliantla Pırlantalı gecələr” verilişi türk dövlətlərdə nümayiş edilir.