Bu il “Oskar” mükafatının təqdimatı zamanı “Ən yaxşı xarici” film nominasiyasına iddialı olan “Sahə” bədii filmi Hollivuddan əliboş qayıtmayıb. Filmdə baş rolu ifa edən Timur Oduşev martın 13-də Kaliforniyanın Los-Anceles şəhərində keçirilən “Hollivudun Gənc Aktyorlar Mükafatı” mərasimində təltif edilib. O, “Xarici bədii filmdə ən yaxşı aparıcı rol” nominasiyasında fərqlənib.

“Hollivudun Gənc Aktyorlar Mükafatı” film sənayesində gənc aktyorlara verilən ən yüksək mükafat hesab edilir. Azərbaycanın “Nərimanfilm” və Gürcüstanın “Gerogiafilm” kinostudiyalarının birgə istehsalı olan “Sahə” bədii filmi Azərbaycan Mədəniyyət və Turizm Nazirliyinin maliyyə dəstəyi ilə çəkilib.