Azərbaycan Dövlət Neft Şirkəti (ARDNŞ) Norveçin "Statoil" şirkəti ilə yeni iş birliyi qurmaq niyyətindədir. Bu barədə ARDNŞ prezidenti Rövnəq Abdullayev məlumat verib.

ARDNŞ-in Norveç şirkəti ilə çoxdan əməkdaşlıq etdiyini bildirən ARDNŞ rəhbəri qeyd edib ki, neft şirkətinin strukturunun yenidən qurulmasında da "Statoil"un təcrübəsindən istifadə olunub.

Noyabrın 10-da "Statoil" şirkətinin rəhbəri ilə Bakıda keçirilən görüş barədə məlumat verən R.Abdullayev bildirib ki, ARDNŞ «Statoil»la dünyanın müxtəlif bölgələrində əməkdaşlıq etmək niyyətindədir: "Statoil"un Şimal dənizində layihələri var, bizim də müəyyən layihələrimiz var. Biz bununla bağlı yeni iş birliyi yaratmaq üçün müzakirələr aparırıq».

R.Abdullayev bildirib ki, hazırda ARDNŞ müxtəlif ölkələrdə - Gürcüstan, Türkiyə, Ukrayna, Rumıniya və s. işləyir: "Bunlar əsasən satışla əlaqədar olan işlərdir. İndi isə biz qərara gəlmişik ki, başqa ölkələrdə, dünyanın digər regionlarında hasilatla da məşğul olaq və indi bununla bağlı işlər aparılır".