Azərbaycan Respublikası Dövlət Neft Fondu (ARDNF) investisiya portfelinin diversifikasiyası və gəlirliliyinin artırılması məqsədilə qızıla investisiya etməyə başlayıb. Bu barədə ANS PRESS-ə ARDNF-in ictimaiyyətlə əlaqələr şöbəsindan məlumat veriblər.

Məlumata görə, bu məqsədlə 2012-ci il fevralın 1-dən etibarən London Qiymətli Metallar Bazarı İştirakçılarının Assosiasiyasının market-meyker üzvü olan banklardan həmin qurum tərəfindən tətbiq edilən tələblərə uyğun olan qızıl külçələrin alışına başlanılıb.

1987-ci ildən fəaliyyət göstərən London Qiymətli Metallar Bazarı İştirakçılarının Assosiasiyası Londonun qızıl və gümüş külçələr bazarındakı beynəlxalq bankları, istehsalçıları, daşıma və saflaşdırma şirkətlərini əhatə edir.

Qeyd edək ki, Azərbaycan prezidentinin 2011-ci il 29 dekabr tarixli Fərmanı ilə təsdiq edilmiş Neft Fondunun İnvestisiya Siyasətinə əsasən, 2012-ci il ərzində Fondun investisiya portfelinin məcmu dəyərinin 5%-ə qədəri qızıla investisiya edilə bilər.