Bu günə damğa vuran xəbər “Volqa”da top qovan futbolçu Vaqif Cavadovun klubdan qovulması oldu. Üstəlik, Vaqif Cavadovun klubu ilə birlikdə Antalyada təlim-məşq toplanışında olmaması da şübhələri artırıb.

Futbolçunun özü və klubu ilə əlaqə saxlayanda, məlum oldu ki, bu deyilənlər əsassızdır. Amma Vaqif Cavadov doğrudan da klubla birlikdə Antalyada təlim-məşq toplanışına qatılmayıb.

“Volqa” klubunun mətbuat xidmətinin rəhbəri Sergey Kozunov isə Vaqif Cavadovun müqaviləsinin davam etdiyini deyib. Onun sözlərinə görə, Vaqif hazırda “Volqa”nın oyunçusudur: “O indi də “Volqa”dadır və müqaviləsi hələ qüvvədədir, ləğv olunmayıb. Sadəcə olaraq təlim-məşq toplanışına gəlməyib. Onun komandadan qovulması ilə bağlı xəbər düz deyil. Sadəcə olaraq Vaqif klubla birlikdə Türkiyədə deyil”.

Qeyd edək ki, Vaqif Cavadov Rusiyanın “Volqa” klubuna 2011-ci ilin yayında transfer olunub. Ötən ilin oktyabrında isə o, Azərbaycan milli komandasından 1 il müddətinə kənarlaşdırılıb. Səbəb kimi onun Avro 2012-nin seçmə mərhələsi sərçivəsində Türkiyə ilə matçından əvvəl millinin düşərgəsini özbaşına tərk etməsi göstərilib. Həmin qərarda bildirilir ki, Cavadov Azərbaycan Premyer Liqasında çıxış edəcəyi təqdirdə, AFFA-nın intizam qaydalarına uyğun olaraq, 5 təqvim oyununu buraxacaq, klub isə 5000 manat cərimə olunacaq.