İranın futbol millisinin qapıçısı Əlirza Həqiqi Rusiyanın “Rubin” klubu ilə dörd illik müqavilə imzalayıb. ANS PRESS-in klubun internet saytına istinadən verdiyi məlumata görə, 23 yaşlı iranlı qapıçı Türkiyədə təlim-məşq toplantısında olan komandaya qoşulub.

Tehrandan olan Əlirza Həqiqi indiyədək yerli “Persepolis”də çıxış edib. O, İran çempionatında 73 oyuna çıxıb və 2007-2008-ci il mövsümündə ölkə birincisi olub. Əlirza Həqiqi əvvəllər İranın yeniyetmələr və gənclərdən ibarət millilərində, eləcə də olimpiya yığmasında çıxış edib. Gənc qapıçı ötən ilin oktyabrında ölkənin əsas millisində debüt edib.