Futbol üzrə İngiltərə çempionatında XVII tura yekun vurulub. “Mançester Yunayted” doğma “Old Trafford” stadionunda əzəli rəqibi “Arsenal”ı qəbul edib. Oyun “qırmızı şeytanlar”ın üstünlüyü şəraitində keçib.

“Mançester Yunayted” 41-ci dəqiqədə Ci-Sun Parkın vurduğu yeganə qol sayəsində rəqibini minimal hesabla məğlub edib. Qarşılaşmanın 73-cü dəqiqəsində Ueyn Runi penalti zərbəsini dəqiq yerinə yetirə bilməyib. “Arsenal”ın qolkiperi ingilis futbolçunun zərbəsini dəf edə bilib.

Bu qələbə sayəsində “Mançester Yunayted” “Arsenal”ı turnir cədvəlində ötərək liderliyi ələ keçirib. Hazırda rəqiblərinə nisbətən bir oyun az keçirmiş Aleks Ferqyusonun yetirmələrinin aktivində 34 xal var.