"Neftçi" futbol klubunun Unibank Premyer Liqasının 2010/11 mövsümünün qış fasiləsi üçün hazırlıq planı müəyyənləşib. Komanda üzvləri gələn ilin oyunlarına 3 mərhələdə hazırlaşacaqlar.

Klubdan ANS PRESS-ə verilən məlumata görə, futbolçular əvvəlcə yanvarın 7-8-də Bakıda tibbi baxışdan keçəcəklər. "Ağ-qaralar" yanvarın 10-da ölkə xaricinə yollanacaqlar. Türkiyənin Antalya şəhərində keçiriləcək ilk mərhələ ayın 20-də yekunlaşacaq.

İkinci mərhələ isə 24 yanvar - 4 fevral aralığında yenidən Antalyada baş tutacaq. Futbolçularımız baş məşqçi Arif Əsədovun rəhbərliyi altında hazırlıq tapşırıqlarını yerinə yetirməklə yanaşı, bir neçə yoldaşlıq görüşündə qüvvələrini sınayacaqlar. Hazırlığın sonuncu mərhələsi isə Bakıda keçiriləcək.