Avstriyada təlim-məşq toplanışında olan millimiz bu gün ikinci yoxlama matçına çıxacaq. Berti Foqtsun komandası bu dəfə Makedoniya millisi ilə oyunda qüvvəsini sınayacaq. Hansı ki, bu rəqiblə indiyədək keçirdiyimiz 3 oyunda heç vaxt qalib gələ bilməmişik. İki dəfə məğlubiyyət (1:2, 0:3) acısı dadan təmsilçimiz bir dəfə də heç-heçəyə razılaşıb – 1:1.

Üç gün əvvəl Moldova ilə bərabərə qalan yığmamız daha güclü makedoniyalılarla qarşılaşmada məğlubiyyətsiz oyunlar seriyasını davam etdirməyə çalışacaq. FİFA-nın son reytinqində 61-ci olmasına baxmayaraq, makedoniyalılar millimiz qarşısına idealdan uzaq heyətlə çıxacaq. Çünki rəqibimizin lideri, əsas qol ümidi olan Qoran Pandev komandamıza qarşı oynamayacaq. Komandamızın heyətində isə, moldovalılarla görüşdə olduğu kimi, Vaqif Cavadovun çıxış etməyəcəyi gözlənilir. ANSPRESS