“Turnirin ilk oyunu olduğu üçün komanda bir az həyəcanlı idi. Buna baxmayaraq, oyuna yaxşı başladıq və erkən qol vurduq”. ANS PRESS-in məlumatına görə, bu barədə 17 yaşadək futbolçulardan ibarət Azərbaycan və İrlandiya komandaları arasında bu gün keçirilən oyundan sonra açıqlama verən yığmamızın baş məşqçisi Təbriz Həsənov deyib. O qeyd edib ki, ikinci hissədə komandamız bir neçə əlverişli vəziyyətdən itsifadə edə bilməyib. “Qapıçının səhvi nəticəsində qol buraxdıq. Növbəti oyunlara daha yaxşı hazırlaşıb turniri qənaətbəxş nəticə ilə başa vurmaq istəyirik”, - deyə Həsənov əlavə edib.

Xatırladaq ki, Türkiyənin İzmir şəhərində təşkil olunmuş beynəlxalq turnirdə bu gün 17 yaşadək futbolçulardan ibarət Azərbaycan və İrlandiya komandaları qarşılaşıb. Oyun 1:1 hesabı ilə başa çatıb. Yığmamızın heyətində Orxan Əliyev fərqlənib.