Türkiyənin paytaxtı Ankarada güləş üzrə gənclər arasında XV “Çempionlar” beynəlxalq turnirinə yekun vurulub. Azərbaycan Güləş Federasiyasının mətbuat xidmətindən ANS PRESS-ə verilən məlumata görə, 2012-ci ilin təqvim planına əsasən, qeyd olunan turnirdə hər üç güləş növü üzrə yığma komandalarımız da iştirak edib.

Böyük məşqçi Həsrət Məmmədyarovun rəhbərliyi altında yarışda iştirak edən gənc qızlardan ibarət yığmamızın heyətində Aydan Səfərli (55 kq) bürünc medal qazanıb.

Sərbəst güləşçilər məşqçi Elnur Aslanovun rəhbərliyi altında ölkəmizi təmsil ediblər və onlardan Orxan Şərifov (84 kq) 3-cü nəticə göstərib. Böyük məşqçi İlqar Abdulov və məşqçi Akif Əliyevin rəhbərliyi altında Ankaraya yollanan yunan-roma güləşçilərimz içərisində Şamil Ertuqanov (74 kq) finalda komanda yoldaşı Toğrul Yunusluya qalib gəlib. Sakit Quliyev (55 kq) və Rövşən Tağıyev (60 kq) gümüş, Ceyhun Əliyev (66 kq) isə bürünc medala layiq görülüb.