Azərbaycanın futbol üzrə yığma komandası 19 yaşadək futbolçular arasında Avropa çempionatının seçmə qrup mərhələsində 2-ci qələbəsini qazanıb. AFFA-dan verilən məlumata görə, Polşa millisi ilə qarşılaşan futbolçularımız 2:1 hesabı ilə qalib gəliblər.

Görüşdə hesabı oyunun 40-cı dəqiqəsində Araz Abdullayev açıb. 2-ci hissənin 53-cü dəqiqəsində polşalı Mixal Kuxarçik bərabərlik qolunu vursa da, oyunun 82-ci dəqiqəsində Mirhüseyn Seyidov Azərbaycan yığmasının qələbə topunu polşalıların qapısından keçirib. Bu qələbədən sonra yığmamız yer aldığı qrupda vahid lider olub.
19 yaşlılardan ibarət Azərbaycan yığması ilk görüşündə İsrail komandasına 3:0 hesabı ilə qalib gəlmişdi. Azərbaycan millisi növbəti oyununu oktyabrın 14-də Danimarka komandasına qarşı keçirəcək.
19 yaşlılardan ibarət Azərbaycan yığmasının yer aldığı qrupun oyunları İsraildə keçirilir. ANSPRESS