Polşada ağır atletika üzrə Dünya çempionatı davam edir. Vrotslav yarışmasının növbəti günü Firudin Quliyev üçün düşərli olub. İdmançımız çümpionatın bürünc medalını qazanıb.
69 kq çəki dərəcəsində çıxış edən bahadırımız Vrotslavda fəxri kürsünün üçüncü pilləsinə qalxıb. Kazan Universiadasının qalibi ümumi hesabda 337 kq ağırlıq qaldıraraq dünya çempionatının bürünc medalını qazanıb. Birdən qaldırma növündə ağır atletimiz 143 kq çəki ilə səkkizinci olub. Bu geriləməni aradan qaldırmaq üçün Firudin təkanla qaldırma növündə 194 kq-lıq ağırlıq sifariş edib.

Onun bu riski boşa getməyib. O, sifariş etdiyi 194 kq-ı ram edərək dünya rekordunu təzələyib və bu növdə kiçik qızıl medala sahib olub. Bu göstərici həm də ağır atletimizə yarışın bürünc medalını qazandırıb. 69 kq-da dünya çempionu adını isə ümumi hesabda 358 kq toplamış çinli Lyao qazanıb.