Azərbaycan yığma komandasının sabiq baş məşqçisi Şahin Diniyevin "Terek"dəki taleyinə aydınlıq gətirilib. Əsas komandanı ötən mövsümdə son 5 görüşə çıxaran Diniyev bundan sonra yeni baş məşqçi Anatoli Baydaçnının birinci köməkçisi funksiyasını yerinə yetirəcək. Diniyev ümumilikdə 3-4 vəzifəni icra edəcək. Əvəzedicilər də daxil olmaqla bütün aşağı yaş qruplarının koordinatoru kimi çalışacaq Diniyev yanvarda istifadəyə veriləcək Futbol Akademiyasına da rəhbərlik edəcək.

Diniyevin rəhbərlik edəcəyi Akademiyada ilk olaraq 100 çeçen oğlu futbolun sirrlərini öyrənəcək. Rəhbərlik akademiyada təhsil alanların sayını ildən-ilə daha da artıracaq.

Qeyd edək ki, Diniyev ötən ilin ilk günündə "Terek"lə müqavilə bağlamışdı. Çeçenistan təmsilçisinin əvəzedici heyətini çalışdıran Diniyevə daha sonra əsas komandanın sükanı həvalə olunmuşdu. Hazırda onun klubla müqaviləsinin müddəti başa çatıb. Deyilənə görə, Diniyev Rusiyaya qayıtdıqdan sonra yeni üçillik müqaviləyə imza atacaq və xeyli yüksək əməkhaqqı alacaq. ANSPRESS