Futbol üzrə İngiltərə yığma komandasının baş məşqçisi Fabio Kapello Devid Bekhemin Cənubi Afrikaya getməsini istəyir. Bunu İspaniyanın “Gol” televeziyasına müsahibəsində italiyalı mütəxəssis bildirib.

“Təəssüf ki, Bekhemin oynamayacağı dəqiqləşib”,-deyən Kapello onun İngiltərə yığmasına mənəvi dəstək ola biləcəyini bildirib.

Xatırladaq ki, martın 14-də baş tutan “Milan” - “Kievo” oyununda zədələnən və baldır əzələlərinin dabana bağlı olan vətəri qopan məşhur ingilis futbolçusu Devid Bekhem bu həftə Finlandiyada əməliyyat olunub. 34 yaşlı futbolçunun təqribən 6 ay müddətində yaşıl meydanlardan uzaq qalacağı gözlənilir. Bununla da ingilis futbolçunun 2010 Dünya çempionatında iştirak etməyəcəyi dəqiqləşib. ANSPRESS