Bu gün London olimpiadasında ağırlıqqaldırma üzrə ilk təmsilçimiz Valentin Xristov podiuma çıxıb. Məlumata görə, 18 yaşlı idmançımız A qrupunda qüvvəsini sınayıb.

Bu qrupda 10 ağırlıqqaldıranın mübarizə aparacağı yarışa Bakı vaxtı ilə saat 23:00-da start verilib.

Xristov birdən qaldırmada 123 kq sifariş vermişdi ki, bunun da öhdəsindən layiqincə gəlib. İdmançımız ikinci cəhdində 127 kq-ı başı üzərinə qaldırıb. Xristovun üçüncü cəhdi isə uğursuz alınıb. O, 130 kq-ın öhdəsindən gələ bilməyib.

Təmsilçimiz təkanla qaldırmada da ilk cəhdi uğurlu alınıb. Xristov 154 kq-ın öhdəsindən layiqincə gəlib. Lakin idmançımız 158 kq-ı başı üzərinə qaldıra bilməyib. Bununla belə, Xristov üçüncü cəhdində 159 kq-ı qaldırmaqda çətinlik çəkməyib və bürünc medala sahib çıxıb. Bu, Azərbaycanın Olimpiya oyunlarında qazandığı ilk medal olub.

Qeyd edək ki, olimpiadada ağırlıqqaldırma millimiz 5 kişi və 1 qadın idmançı ilə təmsil olunur.